Vermoshi- Kelmend

Është pika më veriore e Shqipërisë. Një fshat malor i Alpeve perëndimore që ndodhet 97 km në veri të Shkodrës në krahinën e Kelmendit.

Bukuria e natyrës shfaqet që në qafën e rrafshit. Peisazhi i bukur malor përshkohet nga gjarpërimi i kristaltë i lumit të Cenit.

Vermoshi ndodhet neë një pllajë 1100 m mbi nivelin e detit dhe rrethohet nga faqe të thepisura mali plot gjelbërim. Ngjitjet malore, shëtitjet, por dhe vetë peshkimi i troftës së egër janë disa nga mënyrat me terheqëse për të shijuar qëndrimin dhe bukuritë e fshatit Vermosh.
Valbonë- Tropojë

Valbona është një fshat malor që ndodhet 25 km larg Bajram Currit në luginën e Valbonës, në pjesën lindore të alpeve të Shqipërisë. Fshati Valbonë ose siç quhet ndryshe Selimaj është qendra me e rëndësishme e banuar e luginës dhe njeherazi një nga pikat më turistike në Shqiperinë e veriut. Kullat karakteristike dhe natyra e papërsëritshme e luginës së Valbonës janë në një harmoni mbreslënëse, ku madheshtisë së natyrës i është përshtatur dora e njeriut me shtëpitë shekulllore. Bujtinat e këndshme dhe ushqimi tradicional, peisazhet magjepsëse alpine , uji i kthjellët apo thjeshtë perëndimet e mrekullueshme apo ashpërsia e natyrës e bën Valbonën, lumin dhe fshatin, një nga destinacionet më të veçanta të Ballkanit.

Thethi- Shkodër

Thethi ndodhet 75 km larg Shkodrës. Fshati i bukur alpin rrethohet nga malet që arrijnë deri në 2500 m lartësi duke ofruar pamje të mrekullueshme brenda dhe jashtë tij. Kullat shekullore te restauruara të rikthyera në stadin e tyre origjinal presin qindra turistë shqiptarë e të huaj. Kulla e Ngujimit e sa kulla të tjera janë dëshmi të gjalla të historisë ndër shekuj. Teksa largohesh nga qendra e fshatit drjet bukurive të tjera alpine, kullat e lagjes së Grunjasit – lagjes më të vjetër të Thethit- mes lartësive të thepisura, të shpien drejt ujëvarës së Gurit të Zi që ndodhet 900 m lartësi mbi urën e drurit. Natyra e larmishme alpine e Thethit ofron mundësinë e ngjitjeve malore, peshkimit dhe shëtitjeve relaksuese. Natyra e bukur, fauna e pasur, arkitektura alpine dhe ushqimet karakteristike e bëjne Thethin një atraksion turistik të papërsëritshëm edhe në muajt e vjeshtës.

Lin- Pogradec

Lini është një fshat i mrekullueshëm që ndodhet në brigjet perëndimore të liqenit të Ohrit, 20 km nga qyteti i Pogradecit. Lugina e bukur ku ngrihen shtëpitë karakteristike të cilat shohin nga liqeni, përbëjnë një mjedis të mrekullueshëm ku liqeni dhe fshati janë pjesë të pandara të njëri-tjetrit. Bazilika e fshatit që i përket shek të VII pas.K, mozaikët e hershëm, historia qindravjeçare, kuzhina karakteristike ku peshku zë vendin kryesor dhe natyrisht liqeni janë atraksionet kryesore te fshatit për të gjithë ata që kërkojnë relaksin dhe largimin nga e perditshmja e jetës së qytetit.

Voskopoja- Korçë

Një nga qendrat më të rëndësishme të historisë së ballkanit. Fshati ndodhet 20 km nga qyteti i Korcës dhe ngrihet mbi një pllajë 1160m mbi nivelin e detit. Voskopoja i ka fillimet e saj në vitin 1330 dhe arriti kulmin e zhvillimit në fund të shekullit të 18 me një popullis prej 30 mijë banorësh. Manastiri i Shën Prodhomit, por dhe kishat mesjetare ofrojnë piktura, murale dhe ikona të piktorëve dhe ikonografëve të rëndësishëm shqiptarë. Bukuritë e natyrës dhe historisë së pasur, u shtohen edhe hotelet dhe shtëpitë e bukura që ofrojnë kushte të përshtatshme për ata qe duan pushim të veçantë larg zhurmës dhe ritmit të qytetit.

Benjë- Përmet

Nëse vizitoni Përmetin qytetin e luleve, natyrisht që një destinacion tjetër i paevitueshëm është fshati Benja që ndodhet vetëm 13 km larg Përmetit. Shtëpitë e bukura dhe Kisha Ortodokse e shek 18, natyra e virgjër dhe ujërat termal e kanë kthyer fshatin në një destinacion të mrekullueshëm për gjithë vitin. Ura mbi lumin e Langaricës është një tjetër atraksion që paraprin kanionet e bukura të Langaricës. Benja njihet dhe për ushqimet karakteristike përmetare që iu japin shije ditëve të paharrueshme në këtë perlë të mirëfilltë të Përmetit./Nga Zhaklin Lekatari