Sipas një artikulli të publikuar së fundmi nga “Europa Wester Balkans” mësohet se ende nuk është arritur një stad ku mund të përcaktohet se kur do të miratohet qëndrimi i përbashkët i BE-së për këtë raport. Kjo nënkupton se nuk mund të parashikohet se kur procesi do të finalizohet dhe do të hapë rrugën për fazat e ardhshme të negociatave.

IBAR përbën një filtër thelbësor në procesin e integrimit, pasi reflekton vlerësimin e Komisionit Europian mbi përmbushjen e standardeve të ndërmjetme në kuadër të Grupit 1- “Bazat”. Ky grup përfshin disa nga shtyllat më të rëndësishme të shtetit, si sundimi i ligjit, funksionimi i gjyqësorit, të drejtat themelore, institucionet demokratike dhe reforma në administratën publike.

Një vlerësim pozitiv i IBAR-it do të ishte vendimtar për ecurinë e mëtejshme të Shqipërisë drejt BE-së. Pa këtë hap, procesi nuk mund të avancojë drejt mbylljes përfundimtare të kapitujve negociues, pavarësisht faktit se vendi tashmë i ka hapur të gjitha ato.

Diskutimet e fundit mbi këtë çështje u zhvilluan ditën e sotme, në kuadër të Grupit të Punës për Zgjerimin të Këshillit, ku shtetet anëtare shkëmbyen pikëpamje, ngritën pyetje dhe morën përgjigje nga përfaqësuesit e Komisionit Evropian. Megjithatë, takimi nuk prodhoi një përfundim konkret, duke lënë procesin në një fazë reflektimi dhe negocimi.

Në vijim, pritet që Presidenca e Këshillit të paraqesë një tekst kompromisi për projekt-Qëndrimin e Përbashkët të përkohshëm të BE-së për Grupin 1. Ky dokument është një hap i domosdoshëm për të kaluar në nivele më të larta vendimmarrjeje, përfshirë miratimin nga Komiteti i Përfaqësuesve të Përhershëm dhe më pas mbajtjen e një Konference Ndërqeveritare me Shqipërinë, ku vendimi do të formalizohej.

Megjithatë, për momentin i gjithë procesi mbetet në fazë fillestare dhe pa një kalendar të përcaktuar për hapat e ardhshëm.