Bashkimi Evropian po shqyrton një paketë masash parandaluese për të kufizuar ndikimin mbi ekonomitë e vendeve anëtare dhe jetën e qytetarëve. Plani, i njohur si “Përshpejtoni BE” dhe i hartuar nga Komisioni Evropian, pritet të prezantohet më 22 prill.

Sipas një drafti paraprak, ndër masat kryesore të rekomanduara përfshihet vendosja e të paktën një dite pune në distancë në javë, me qëllim uljen e konsumit të karburantit dhe reduktimin e qarkullimit të automjeteve.

Po ashtu, parashikohen bileta të transportit publik me çmime të reduktuara, si dhe masa për kursimin e energjisë në nivel familjar dhe institucional.

Plani sugjeron gjithashtu uljen e kostove të ngrohjes, shpërndarjen e kuponëve energjetikë për familjet në nevojë dhe zhvendosjen e konsumit të energjisë jashtë orareve të pikut.

Për bizneset kërkohet rritje e eficiencës energjetike, ndërsa administrata publike inkurajohet të japë shembull në kursimin e energjisë, përfshirë ndriçimin dhe përdorimin e burimeve.

Megjithatë, masat mbeten në fazë propozimi dhe nuk janë detyruese për shtetet anëtare. Reagimet e para kanë qenë të ndryshme. Në Spanjë, ministrja e Punës Yolanda Díaz ka kundërshtuar idenë e detyrimit për punë në distancë, duke theksuar se një praktikë e tillë duhet të mbetet vullnetare.